Azərbaycanda
keyfiyyətin səsi
- Assosiasiya
- Haqqımızda
- Tərəfdaşlar
Tərəfdaşlar
Keyfiyyət Assosiasiya öz fəaliyyətində aşağıdakı
qurumlarla əməkdaşlıq edir:

Bacarıqların inkişaf etdirilməsi üzrə sahə komissiyaları
Ölkədə ixtisaslı işçi qüvvəsinin formalaşdırılması və rəqabətqabiliyyətliliyinin artırılmasında, təhsilin məzmununun əmək bazarının tələblərinə uyğunlaşdırılmasında əhəmiyyətli vasitə hesab edilən peşə və kvalifikasiya standartlarının normativ hüquqi bazasının yaradılması məqsədilə Azərbaycan Respublikasının Nazirlər Kabinetinin 2019-cu il 12 dekabr tarixli 474 nömrəli qərarı ilə “Peşə və kvalifikasiya standartının hazırlanması , yenidən hazırlanması, təsdiq edilməsi, qeydiyyatının aparılması və müddətinin uzadılması Qaydaları”, 2019 -cu il 12 dekabr tarixli 475 nömrəli qərarı ilə “Bacarıqların inkişaf etdirilməsi üzrə sahə komissiyalarının yaradılması və əsasnaməsi” təsdiq edilmişdir.
Sözügedən normativ hüquqi sənədlər peşə və kvalifikasiya standartının hazırlanması və təsdiq edilməsi mexanizmini , eyni zamanda standartların hazırlanması ilə bağlı həyata keçirilən fəaliyyətlərin əlaqələndirilməsi məqsədilə Bacarıqların inkişaf etdirilməsi üzrə sahə komissiyalarının təşkilinin və fəaliyyətinin hüquqi əsaslarını müəyyən edir.
Bununla əlaqədar olaraq, iqtisadiyyatın müxtəlif sahələrində işçilərin peşə bacarıqlarına olan ehtiyacların öyrənilməsi, standartların hazırlanması, yenidən hazırlanması və ya müddətinin uzadılması ilə bağlı müzakirələrin keçirilməsi, təkliflərin verilməsi, kollegalıq və aşkarlıq prinsipləri əsasında qərarların qəbul edilməsi məqsədilə sahə komissiyaları yaradılmışdır.
Keyfiyyət Assosiasiyası” İctimai Birliyi Emal sənayesində bacarıqların inkişaf etdirilməsi üzrə sahə komissiyasına, Elektrik enerjisi, qaz, hava, su, buxar təchizatı və tullantıların təmizlənməsi sahələrində bacarıqların inkişaf etdirilməsi üzrə sahə komissiyasına, həmçinin Ticarət, biznesin idarə olunması və fərdi xidmətlərin göstərilməsi sahəsində bacarıqların inkişaf etdirilməsi üzrə sahə komissiyasına və sözügedən komissiyaların işçi qruplarına daxil edilmişdir.

Kodeks Alimentarius Milli Komissiyası
Azərbaycan Respublikasında əhalinin qida məhsulları ilə etibarlı təminatı dövlətin sosial-iqtisadi siyasətinin başlıca istiqamətlərindən biridir. Son illərdə qida təhlükəsizliyinin təmin edilməsi, qidaməhsullarının keyfiyyətinin yüksəldilməsi və ixrac potensialının artırılması sahəsində nəzərəçarpan nailiyyətlər əldə edilmişdir.
Görülmüş tədbirlərin davamı olaraq, ölkədə əhalini təhlükəsiz və keyfiyyətli qida məhsulları ilə təmin edilməsi, qida məhsullarının təhlükəsizliyinə nəzarət sisteminin səmərəliliyinin daha da artırılması əsas vəzifələrdən biri kimi müəyyən edilmişdir.
Qida təhlükəsizliyi sahəsində norma və qaydaların beynəlxalq tələblərə uyğunlaşdırılması məqsədilə Azərbaycan Respublikası Qida təhlükəsizliyi Agentliyi (AQTA) sədrinin 09.08. 2019-cu il tarixli Ü/103 nömərəli əmrinə əsasən Agentliyin struktur bölməsi olan Azərbaycan Qida Təhlükəsizliyi İnstitutunda Kodeks Alimentarius Milli Komissiyası yaradılmış və “Keyfiyyət Assosiasiyası” İctimai Birliyi (KAİB) qeyd olunan Komissiya üzv seçilmişdir.
Bundan başqa qida sahəsində yeni norma və qayda yaratma fəaliyyətlərində fəal iştirak edən KAİB-in qida üzrə mütəxəssisləri Komissiyanın bir sıra komitələrinə ekspert olaraq cəlb olunmuşdur.

Azərbaycan Respublikasının Biznes Mühiti və Beynəlxalq Reytinqlər üzrə Komissiyası
Azərbaycan Respublikasında həyata keçirilən davamlı iqtisadi islahatlar iqtisadiyyatın neftdən asılılığının minimuma endirilməsi, biznes və investisiya mühitinin yaxşılaşdırılması, sahibkarlığa dövlət dəstəyi və milli iqtisadiyyatın rəqabətqabiliyyətliyinin artırılması yolu ilə iqtisadiyyatda dayanıqlı və sürətli inkişafa nail olunmasına istiqamətlənmişdir.
Aparılan islahatların davamı olaraq Azərbaycan Respublikası Prezidentinin 2016-cı il 13 iyul tarixli 2199 nömrəli Sərəncamı ilə Biznes mühiti və beynəlxalq reytinqlər üzrə Komissiya yaradılmışdır.
Komissiyanın yaradılmasında məqsəd sahibkarlıq fəaliyyətinin optimal gəlirliliyini təmin edəcək və rəqabət prinsiplərinə əsaslanacaq biznes mühiti yaratmaq, ölkənin investisiya cəlbediciliyini artırmaq, beynəlxalq reytinqlərdə Azərbaycanın mövqeyini daha da yaxşılaşdırmaq üçün qanunvericiliyin və inzibatçılığın təkmilləşdirilməsi və bu istiqamətdə digər zəruri tədbirlərin görülməsinə nail olmaqdır.
Komissiyanın əsas vəzifələri biznes mühitinin və beynəlxalq reytinqlərdə Azərbaycanın mövqeyinin yaxşılaşdırılmasını təmin edəcək məsələlərin həlli ilə bağlı proqram və layihələr hazırlamaq, onların hazırlanması və həyata keçirilməsi üçün yerli və xarici ekspertləri cəlb etmək, bu sahədə dövlət orqanları və qurumlarının fəaliyyətini əlaqələndirməkdir.
Ölkəmizdə biznes mühitinin və beynəlxalq reytinqlərdə Azərbaycanın mövqeyinin yaxşılaşdırılmasını təmin edəcək məsələlərin həlli ilə bağlı proqram və layihələrin hazırlanması və həyata keçirilməsi məqsədilə Biznes mühiti və Beynəlxalq Reytinqlər üzrə Komissiyanın tərkibində 18 işçi qrupu yaradılmışdır. “Keyfiyyət Assosiasiyası” İctimai Birliyi həmin komissiyanın “Əmtəə bazarının səmərəliliyi və rəqabət” adlı işçi qrupuna daxil edilmişdir.

Azərbaycan Respublikasının İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti
Azərbaycan Respublikasının İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti (bundan sonra – Xidmət) antiinhisar, haqsız rəqabət, dövlət satınalmaları, reklam (açıq məkanda reklam istisna olmaqla), standartlaşdırma, metrologiya, texniki tənzimləmə, uyğunluğun qiymətləndirilməsi, akkreditasiya, keyfiyyətin idarə edilməsi, istehlakçıların hüquqlarının müdafiəsi və istehlak bazarına nəzarət sahələrində (bundan sonra – müvafiq sahə) dövlət nəzarətinin və tənzimlənməsinin həyata keçirilməsini təmin edən, Azərbaycan Respublikası İqtisadiyyat Nazirliyinin (bundan sonra – Nazirlik) strukturuna daxil olan qurumdur.
Xidmət öz fəaliyyətində Azərbaycan Respublikasının Konstitusiyasını, Azərbaycan Respublikasının tərəfdar çıxdığı beynəlxalq müqavilələri, Azərbaycan Respublikasının qanunlarını, Azərbaycan Respublikasının İqtisadiyyat Nazirliyi haqqında Əsasnaməni, bu Əsasnaməni, Azərbaycan Respublikası Prezidentinin digər fərman və sərəncamlarını, Azərbaycan Respublikası Nazirlər Kabinetinin qərar və sərəncamlarını, habelə Nazirliyin hüquqi aktlarını rəhbər tutur.
Xidmət öz vəzifələrini yerinə yetirərkən və hüquqlarını həyata keçirərkən Azərbaycan Respublikasının mərkəzi və yerli icra hakimiyyəti orqanları, yerli özünüidarəetmə orqanları, beynəlxalq və qeyri-hökumət təşkilatları ilə, habelə digər hüquqi və fiziki şəxslərlə qarşılıqlı əlaqədə fəaliyyət göstərir.
4 may 2022-ci il tarixində İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti ilə “Keyfiyyət Assosiasiyası” İctimai Birliyi arasında Anlaşma Memorandumu imzalanıb.
Memoranduma əsasən tərəflər arasında texniki tənzimləmə, standartlaşdırma, uyğunluğun qiymətləndirilməsi, metrologiya, akkreditasiya və ümumilikdə keyfiyyət infrastrukturu sahəsində işlərin təşkili və təkmilləşdirilməsi, həmçinin bu istiqamətində birgə tədbirlərin görülməsi nəzərdə tutulur.
Sənəddə, həmçinin əməkdaşlıq çərçivəsində araşdırma və tədqiqatlar yolu ilə yeni texniki normativ sənədlərin işlənib hazırlanması, onların beynəlxalq standartlara və yerli tələbata uyğunlaşdırılması məsələləri də öz əksini tapıb.
Keyfiyyət infrastrukturu sahəsinə marağın və məsuliyyətin artırılması məqsədilə keyfiyyət üzrə “Milli Mükafat”ın təsis edilməsi və qabaqcıl müəssisələrin mükafatlandırılması da sənəddə qeyd olunub.
Əməkdaşlıq çərçivəsində texniki tənzimləmə, standartlaşdırma, uyğunluğun qiymətləndirilməsi, metrologiya, akkreditasiya sahəsində yüksəkixtisaslı kadrların hazırlanması, eləcə də birgə proqramların içşlənib hazırlanması və həyat keçirilməsi nəzərdə tutulur.

Azərbaycan Standartlaşdırma İnstitutu
Azərbaycan Respublikası Prezidentinin 10 fevral 2017-ci il tarixli 1234 nömrəli Fərmanına əsasən “Azərbaycan Standartlaşdırma İnstitutu” (AZSTAND) publik hüquqi şəxsi təsis edilmiş və standartların hazırlanması, tətbiqi, bu sahədə beynəlxalq təşkilatlarda təmsilçilik bu quruma həvalə edilmişdir.
İnstitutun əsas fəaliyyət istiqamətləri aşağıdakılardır:
- standartların hazırlanması, qəbulu və ləğv edilməsi;
- dövlət standartlar fondunun idarə edilməsi;
- texniki komitələrin fəaliyyətinin əlaqələndirilməsi;
- Azərbaycan Respublikasının standartlaşdırma üzrə beynəlxalq və regional təşkilatlarında təmsil edilməsi;
- standartlaşdırma üzrə xarici ölkələrin təşkilatları ilə ikitərəfli əməkdaşlıq əlaqələrinin qurulması;
- standartlaşdırma və uyğunluğun qiymətləndirilməsi fəaliyyətinin təşviq edilməsi;2017-ci ildən İnsititut ISO-nun tamhüquqlu üzvü olmaqla yanaşı Beynəlxalq Elektrotexniki Komissiyanın (İEC) Müxbir ölkələr proqramında (Affiliate Country Program) iştirak edir, Avropa Standartlaşdırma Təşkilatında (CEN) Tərəfdaş standartlaşdırma orqanı (CSB) statusunda təmsil olunur.
09 iyun 2021-ci il tarixində “Azərbaycan Standartlaşdırma İnstitutu” publik hüquqi şəxsi və “Keyfiyyət Assosiasiyası” İctimai Birliyi arasında əməkdaşlıq haqqında anlaşma memorandumu imzalanmışdır. Anlaşma memorandumuna əsasən iki qurum arasında texniki tənzimləmə, standartlaşdırma, uyğunluğun qiymətləndirilməsi, ümumilikdə keyfiyyət infrastrukturu çərçivəsində mövcud işlərin və fəaliyyətlərin təşkili, yenidən təşkili, təkmilləşdirilməsi və yaxşılaşdırılması, ölkədə istehsal olunan məhsul və xidmətlərin keyfiyyətinin artırılması, araşdırma və tədqiqatlar yolu ilə dövlət standartlarının, yeni texniki normativ sənədlərin hazırlanması, təkmilləşdirilməsi və regional standartlarla harmonizasiyası və onların tətbiqinə dəstək üzrə birgə layihələrin həyata keçirilməsi nəzərdə tutulur.
Hazırda Azərbaycan Standartlaşdırma İnstitutu ilə Keyfiyyət Assosiasiyası arasında yuxarıda qeyd olunan istiqamətlər üzrə əməkdaşlıq çərçivəsində işlər uğurla davam etdirilir.




