AZƏRBAYCANDA
KEYFİYYƏTİN SƏSİ

Etik Davranış və
İşgüzar Dürüstlük Siyasəti

1. Məqsəd və Əhatə Dairəsi

Bu Kodeksin məqsədi KAİB-in bütün üzvləri, işçiləri, könüllüləri, təchizatçıları və tərəfdaşlarının fəaliyyətində dürüstlük, şəffaflıq, məsuliyyətlilik və peşəkarlığı təmin etməkdir. Kodeks Assosiasiyanın bütün fəaliyyət sahələrinə və işgüzar münasibətlərinə şamil olunur.

2. Əsas Prinsiplər

- Dürüstlük: Hər bir üzv və əməkdaş fəaliyyətində doğruluq və şəffaflıqla çıxış etməlidir.
- Hesabatlılıq: Qərar və əməliyyatlar aydın, əsaslandırılmış və sənədləşdirilmiş olmalıdır.
- Qərəzsizlik: Fəaliyyətlər şəxsi maraqlardan deyil, Assosiasiyanın məqsəd və dəyərlərindən irəli gəlməlidir.
- Peşəkarlıq: İşgüzar münasibətlərdə hörmət, düzgünlük və yüksək etik davranış nümayiş olunmalıdır.
- Məsuliyyətlilik: Qanunvericiliyə, Assosiasiyanın Nizamnaməsinə və qəbul edilmiş siyasətlərə riayət olunmalıdır.

3. Korrupsiya və Rüşvətin Qarşısının Alınması

KAİB korrupsiyaya və rüşvətə qarşı sıfır tolerantlıq prinsipini qəbul edir. Hər hansı bir ödəniş, hədiyyə və ya üstünlük işgüzar qərarlara təsir etmək məqsədilə qəbul edilə və ya təqdim oluna bilməz. Bütün maliyyə əməliyyatları şəffaf şəkildə sənədləşdirilməli və hesabatlarda əks etdirilməlidir.

4. Hədiyyələr və Qonaqpərvərlik

Simvolik və işgüzar münasibətlərə uyğun hədiyyələr yalnız İdarə Heyətinin təsdiqi ilə qəbul edilə bilər. Dövlət orqanları və ictimai təşkilatlarla münasibətlərdə hədiyyə və ya qeyri-rəsmi ödənişlərin qəbulu qəti qadağandır. Qonaqpərvərlik yalnız etik çərçivədə, rəsmi tədbirlər və görüşlərlə məhdudlaşmalıdır.

5. Maraqlar Toqquşması

Üzvlər və işçilər şəxsi maraqlarının KAİB-in maraqları ilə toqquşduğu halları dərhal bəyan etməlidirlər. Qohumluq, dostluq və şəxsi münasibətlər əsasında qərar qəbul etmək qadağandır. Tender və layihə seçimlərində şəffaflıq təmin edilməlidir.

6. Konfidensiallıq və Məlumatların Qorunması

KAİB-in daxili sənədləri, maliyyə məlumatları və şəxsi məlumatlar məxfi saxlanmalıdır. Məlumatlardan yalnız Assosiasiyanın məqsədlərinə uyğun istifadə edilə bilər. İcazəsiz paylaşım və məlumatların üçüncü tərəfə ötürülməsi qadağandır.

7. İnsan Hüquqlarına və Bərabərliyə Hörmət

KAİB fəaliyyətində diskriminasiyaya yol verilmir. Bütün üzvlərə və işçilərə cins, din, dil, etnik mənsubiyyət, siyasi baxış və sosial vəziyyətindən asılı olmayaraq bərabər münasibət göstərilir. İş mühitində zorakılıq, təzyiq və qeyri-etik davranışlara yol verilmir.

8. Şikayət və İfşa Mexanizmi

KAİB üzvləri və əməkdaşları etik pozuntular barədə anonim şəkildə müraciət edə bilərlər. Şikayətlər qərəzsiz araşdırılır və cavablandırılır. Şikayət edən şəxslərə qarşı hər hansı təzyiq və ya qisas tədbirləri qəti qadağandır.

9. Nəzarət və İntizam Tədbirləri

Bu Kodeksin pozulması intizam tədbirləri, Assosiasiya üzvlüyündən çıxarılma və hüquqi məsuliyyətlə nəticələnə bilər. Qanun pozuntuları müvafiq dövlət qurumlarına ötürülə bilər.

10. Təsdiq və Qüvvəyə Minmə

Bu Kodeks KAİB İdarə Heyəti tərəfindən qəbul edilmişdir və Assosiasiyanın bütün üzvləri, işçiləri və tərəfdaşları üçün məcburidir.

Adı Soyadı: Samir Novruzlu

Vəzifə: “Keyfiyyət Assosiasiyası” İctimai Birliyin Sədri

Tarix: 01.10.2025

Tərəfdaşlar